العند يرث الكفر ده حال الشباب والسياسيين إللى إخترعوا هوجة يناير ومحدش فيهم عاوز يعترف بخطأه ويقول إن الطريق لجهنم المصرية مفروش بالنوايا الحسنة وإنهم ثاروا والبلد حالها مايل ودلوقتى بقت تيتانك المصرية إللى غرقت فى بحور الظلام وإنقطعت عنها المية والنور وبقينا فى فوضى وبلطجة وإنفلات أمنى عمرنا ما تخيلناه وبقى فيه الفتوة والبلطجى بطل الساعة و مبقاش فيه شيئ غير مستباح إللى يزعل من حاجة يولع فى بيت جاره وإللى قميصه يتحرق يولع فى بيوت الأقباط والبلطجى إللى يقتحم أبراج النيل ويحاول يفرض إتاوات وعربدة و بجاحة يتحول لبطل شعبى ونولع فى المبنى إللى مليان سياح ومش مهم سمعة مصر وخصوصا إنها فلوس ساويروس يعنى ماله نهيبه للصياع.
الإقتصاد خربان وكل واحد بيدور على مطالبه هو بس وإزاى يزود غنيمته من الدولة الساقطة وأخر حاجة يعملها إنه يشتغل والبهوات بتوع النخبة الخايبة ماشيين فى الهيصة زى الأطرش فى الزفة ومش واخدين بالهم إن البلد بتخرب ومفيش حاجة حا تتصلح بالطريقة دى ولكنهم عاملين يتلونوا ويمشوا أمورهم ومش راضيين لا يحاسبوا أنفسهم ولا يقروا بأخطاؤهم.
الشعب بيسأل النخبة الخايبة وإللى سرقوا الهوجة وركبوا ودلدلوا رجليهم يا ترى النهاردة أحسن والا إمبارح صحيح الكهربا كانت غالية علينا لكن ما بتنقطعش والميا ما كانتش بتغيب عن الحنفية ولو لربع ساعة والمواصلات كانت زحمة لكن المترو كان زى الفل والزبالة مضيقانا بس فى الأخر بتتشال والأسعار كانت غالية بس مش بدرجة الجنان الرسمى إللى شايفينه والبنزين موجود ومكانش فيه طوابير والجرايد كثيرة بس كانت ما بتولعش فى البلد ومحمود سعد كان بيقبض ملايينه بس كلامه كان موزون مش مطبلاتى فى سوق الإخوان وبتاع العمارة كان بيتكلم عن الشذوذ ومكانش يوم درويش للسلطة والنهارده ماشى يطبل لها ويغنى على ربابتهم ومش معنى كده إنه كله كان تمام لكن كان فيه دولة ودلوقتى بقينا عايشين فى غابة القوى ياكل الضعيف.
ليه يا بتوع النخبة الخايبة ما تخرجوش وتواجهونا بالحقيقة وتعترفوا بأخطاؤكم وتقوموا البلد مرة تانية علشان نواجه الطاغوت إللى سبتوه يفترسنا والا برضه حا تركبوا دماغكم وتسيبوا الدنيا غرقانة وتقولوا لنا إحنا بتوع الثورة إللى ملهاش مثيل وياريت تسمعوا رأى الناس الغلابة فيكم يمكن تحسوا على دمكم ده لو كان عندكم دم أو فى وشكم حمرة الخجل لكن أنا رأيى فيكم إنه مفيش فايدة وإنتوا عاملين زى الخمورجى إللى بيبرر إدمانه فيقول لك قليل من الخمر يصلح المعدة والرد عليه إن كثير من الخمر يهرى كبدك وزى مدخن الماريجوانا والبانجو يقول لك أنا عاوز أبقى هاى وملهاش أثار جانبية ويدلك على مواقع فى النت بتقول التخريف ده ويتوهك عن المواقع إللى بتقول له إنها بتخرب مخك وإنتوا عاملين زى الراجل الخاين يعمل لمراته شبورة ويختلق حواديت علشان يبان إنه غيران عليها علشان تتلهى عنه وبالظبط زى لعيب الكورة الخسران يتهم الحكم والأرض والرطوبة وحتى زحمة المواصلات علشان يبرر هزيمته.
حسوا على دمكم بقى خلاص وإنتوا عارفين إن الإعتراف بالحق اليومين دول فضيحة وإن بسببكم تيتانك المصرية غرقت وما فاضلش غير إننا نعمل لها فيلم ثلاثى الأبعاد علشان نفكر العالم بإنه كان فيه فى يوم بلد عظيمة خرجت تبحر فى بحر الحرية لكن السواق كان مسطول ومكابر ولبسها فى جبل الإخوان وغرقت حبه حبه ومباقاش فاضل منها غير السارى إللى فوق هرم خوفو ده لو فضل عايش وما هدهوش علشان يبنوا بحجارته ترب الغفير الجديدة.
ليست هناك تعليقات:
إرسال تعليق