الشعب المصرى هو أجمل شعب فى العالم " بدون تحيز" فى خفة الظل والفكاهة والنكته ، فقد تابعت وبشغف أراء عينات من الطبقات المختلفة للشعب المصرى المختلفة لأستطلع رأيهم فى الشروط التى يتمناها فى الرئيس القادم ، وقد تعمدت فى إختياراتى أن أنتقى مجموعة من الشباب وكبارالسن الذين يتميزون بخفة الظل وقد كانت هذه هى شروطهم فى الرئيس القادم الذى يتمنوه حاكما لمصر وبسؤالهم ماهى الشروط التى تطلبوها وتتمنوها فى الرئيس القادم لمصر ؟ فاجابوا واحدا تلو الاخر :
- عايزين ريس مايكونش منوفي ( مع إحترامى وتقديرى لكل المنايفة ) .
- عايزين ريس بمجرد فوزه في الانتخابات وقبل مايحلف اليمين يشتري كرسي تيفال .
- عايزين ريس مايقعدش في القصر الجمهوري .. ياخد له شقه ايجار جديد .... والقصر يتأجر مفروش لرؤساء الدول والامراء الزوار.
- عايزين ريس يكون متواضع جداااا... بس مش لدرجة انه يقعد في خيمه "وما يقولش ثورة ثورة احنا اللى نقول بس"
- عايزين ريس يكون عنده حساب على الفيس بوك بس مابيلعبش "فيلا فارم" ويكتب له بوست واحد في اليوم علشان مايضيعش وقت الشعب.
- عايزين ريس عنده الشجاعة أن يصدر قرار بأن تاخذ زوجته لقب سيدة مصر الاخيره.
- عايزين ريس البدله بتاعته ماتكونش سينييه وماضي عليها الخواجه فيرساتشي الله يرحمه... يجيب بدلته من عند ابونسمه بتاع البدل أو من عند مرعى بتاع الكِلمه .
- عايزين ريس يكون عارف ومتأكد اننا انتخبناه هوفقط مش هو و مراته واولاده وجوز خالته وابن خالة وابن عمه .
- عايزين ريس يستمع كل يوم الصبح لأغنية دامت لمين ويبكى وهو يسمعها .
- عايزين ريس يأكل عيش من ابو شلن لمدة اربعة سنوات من تولى رئاسته وأن يشرب من مية الحنفيه علشان نضمن إن العيش حنعرف نأكله والميه ساعتها حتتشرب .
- عايزين ريس مايكونش عمل اي ضربات جويه ولا ارضيه ولا فضائيه يذل اهلنا بيها.
- عايزين ريس مايعطلش المرور عشان يروح مشوار .......عايز يوصل بسرعه يركب طياره ويأجرها على حسابه .
- عايزين ريس يكون بيتفرج كل يوم على قناة الجزيره وما يطلعش على التلفزيون المحلى .
- عايزين ريس مايكونش راعي الرياضه والرياضيين ولا الثقافه ولا المثقفين ولا الفن ولا الفنانين ولا الصحافة والصحفيين ويسيب الناس دي في حالها علشان نلاقى ناس مصلحين .
- عايزين ريس لا يستخدم بعض المصطلحات التى أصابتنا بالتلوث السمعى مثل محدودي الدخل ، ولا مساس والمرحله المقبله وغيرها من العبارات التي كم ترددت على اسماع الشعب لاسيما فى إحتفالات الأول من مايو من كل عام .
- عايزين ريس لايقول وهو يلقى خطاب للشعب هذه العباراة "الاخوه والاخوات "علشان انا امي ماخلفتش غيري .
- مايكونش بيصلي العيد قبل مايبدأ وتنزل صورته وهو بيصلي في الاهرام يوم الوقفه بالليل في الطبعه الاولى.
- عايزين ريس يمتنع عن عمل الزيارات المفاجأه ويصدر قرار بمنعها لأنه وببساطه احنا اللي هنعمله زيارده مفاجأه كل 3 ساعات .
- عايزين ريس مايفكرش انه عشان بقى ريس يبقى قائد الثورة .
- عايزين ريس يصدر قرار بمنع عبارة "بناء على تعليمات السيد الرئيس" واللي يقولها يتحاكم فورا.
- عايزين ريس يكون بيتكلم وبيفهم انجليزي من غير مايطرطق ودانه ويعمل نفسه مش سامع لما الكلام مايعجبوش.
- عايزين ريس مايضحكش علينا ويروح يفتتح مكان هو نفس المكان اللى افتتحه عشرين مره .
- عايزين ريس يبطل كلمة نشجب وندين .
- عايزين ريس مايكونش من محبي الاستقرار.
- عايزين ريس لما نشتكى له ألامنا مايقولش "عال عال " وكنه شمتان فينا.
- عايزين ريس لما نقول له المنحة ياريس مايقولش "أجيب منين "أربطوا الحزام .
- عايزين ريس إسمه لايحتوى على صفات حميدة مثل "مبارك ، جمال ، العادلى ، نظيف ، الشريف ، العفيف – عايزين نجرب اسماء عكسية يمكن نلاقى فيها أمالنا وأحلامنا ومش مهم تكون العوا ، البرادعى ...الخ المهم الجوهر مش المظهر الخداع فى الإسم .
- عايزين ريس مايعملش ألغاز زى موضوع تصدير الغاز وفى النهاية الشعب خسران وهو اللى فاز .
- عايزين ريس مايستهترش بالشباب وطموحاته ومقدراته ويقول عنهم "خليهم يتسلوا "
- عايزين ريس مايحضرش مباريات المنتخب علشان بيبقى وشه وحش عليهم وبيخسروا اغلب المباريات .
- عايزين ريس فيه صفات الإمام العادل وفيه صفات المسئول عن الرعية مش ريس هردبيسه على ملوخية .
- عايزين ريس لانغنى له ولايغنى علينا شبعنا بجد من ده وده .
- عايزين ريس مانشوفش صورته فى اى مصلحة حكومية ولا طلعته البهية فى القنوات المحلية وكفاية علينا نشعر بأعمالة الإيجابية لمصلحة الشعب لكل مصرى ومصرية ولمصلحة الدول العربية .
ليست هناك تعليقات:
إرسال تعليق