لما الحكومة توصل لدرجة من الضعف إن يكون فيها محافظ زى بتاع أسوان يبقى عليه العوض
لما نسيب الناس هى إللى تتصور القانون وتنصب نفسها قاضى ومنفذ للقانون يبقى عليه العوض لما نسيب الدنيا سايبة وكل واحد يعمل إللى على مزاجه يبقى عليه العوض
لما نسيب ناس تهد كنيسة صول وتقعد يوم بليلة تعمل كده يبقى عليه العوض
لما واحد ودانه تنقطع ومحدش يتحاسب يبقى عليه العوض
لما واحدة لامؤاخذة ...... ترافق إتنين رجالة وهى متجوزه راجل ويموت بسببها ناس وتتحرق بيوت وكنايس علشان خاطر عيونها المدعمسين وتحتفل جريدة الأهرام بنقابها يبقى عليه العوض
لما الرعاع يحكموا بهد منارة الكنيسة وشيل الجرس وتسمع الحكومة كلامهم وكمان يطلعوا الأقباط غلطانين وإللى بيهدموا ممتلكات غيرهم إنهم بيصلحوا الغلط يبقى عليه العوض
لما الإرهابيين يرجعوا واحد ورا التانى ويبتدوا يسمموا البلد يبقى عليه العوض
لما الناس ترفع علم غير علم بلادها يبقى عليه العوض
لما التطرف يبقى عينى عينك وتكفير المسيحيين يبقى علنى فى برامج بيمولها دافعى الضرائب يبقى عليه العوض
لما تلميذة مسيحية ينفرض عليها الحجاب وتنضرب وتتهان فى مدرستها يبقى عليه العوض
لما محافظ قبطى يتعين وتتقطع السكة الحديد وتنخ الحكومة وترفد المحافظ قبل ما يتعين يبقى عليه العوض
لما الجماعة المحظوظة المحظورة سابقا تعمل حزب دينى والحكومة تعمل ودن من طين وودن من عجين وكأنها مش عارفة يبقى عليه العوض
لما الحكومة تبعث الشيخ حسان والشيخ معرفش مين علشان يتحايلوا على الناس يسمعوا كلام الحكومة يبقى عليه العوض
لما الكلام عن الجزية وقطع الرقاب يبقى على عينك يا تاجر من الغوانى والرقاصين يبقى عليه العوض
لما نسمى النكبة ثورة ونسمى النكسة إنتصار يبقى عليه العوض
لما نبقى فرحانين بوكسة الشرطة وإنعدام الأمان يبقى عليه العوض
لما يبقى منتهى أمل المصريين الإفراج عن عمر عبد الرحمن يبقى عليه العوض
لما نسيب أشغالنا وهات يا مظاهرات وإضرابات ونقعد نحلم بمليارات الرئيس يبقى عليه العوض
لما نسيب النبح على السياحة و الأثار شغال يوماتى ما هو كتر الزن على الودان أمر من السحر يبقى عليه العوض
لما الدولة المدنية والعلمانية تبقى كلمة أبيحة يبقى عليه العوض
ولما ولما ولما من هنا لغاية ميت سنة قدام وميقدرش عاقل ومخلص لبلده شايف بلاده الجميلة بتخرب وشايف الثقب فى قاع المركب والبلد بتغرق فشر السفينة تيتانك وكلنا عمالين نسأل السؤال ونقول البلد رايحة على فين وكلنا عارفين إن البلد مش حا تروح لكنها راحت فى ستين داهية ومصيبة ومبقاش غير الحسرة ونقول عليه العوض ومنه العوض
ليست هناك تعليقات:
إرسال تعليق