يا جوقة المسرح بحريه

وصايا العشر زدتيهم وصيه

ويا الياس يا انطون يا همام

بلاكم ليالي الكيف مش هيي

كلما انطلبتو شرفونا قوام

بترّيحونا من البزاريه

انتو على صدر الحياة وسام

ومن عندكم درب الالوهيه

يا الف يخزي العين عزُّو دام

الفيكم زرع شخصيتو وفيي

منكم بيقولو طافح الالهام

وقال الحرف عا سلامتو ليي

بالبعد عنكم كل يوم صيام

وجوع السمع هزات ارضيه

طول الوقت عم تفشخو لقدَّام

علاماتكم ميه على ميه

الكذب سايد والسفاهه كوام

وبتنطفي الانوار ليليه

جيتو عا سدني تفَّسرو الاحلام

هل عم تجي عا البال يوميه

عباس ما بدكم ولا بسام

قطبين انتو كل ساعه بقول

بتغّيرو فصول الطبيعيه

حاجــِـــه بَقا يـــــا رَبّ نَجـينا

البابُور ما بيِرْسي على المينا

كلـــمــا فَشخنا للـــوَرا منْعود

وعـا طُول حُبّ الذات عامينا.

نحنا عرب بالحَرب مَنَّا أْسُود

وما في حَدا عا الأرض يحْمينا

ومش بسّ إنُّو فهمنا محـــدود

نحنا عـــا كعْب الكنفشِه رْبينا.

ولا يــوم عِنّا طقس إسمو بْرود

ومـــــــــــا في حَدا أفراح يعْدينا

مــا منعرف الخُرْدُق من البارود

وأوقات مــــــا منعرف اسامينا.

بها الكون مَنُّو وجودنا موجود

تا نهرب من الحَقّ مـــــــا فينا

اللي بْيهتِــري بيصير كلُّو دود

والأرض متل الخَــوخ والتفاح

وقـــــت اللي هِيِّي دَوَّدتْ جينا.

الشاعـر بعين الناس مــــــا بيبقى حِلو

ان مـــا كــان عندو بكلمتو معْمل حلو

بعين العنـايــــه لازم يشوف الأمُـــور

وعـــــا مواقفو أخــــلاق يدلـق بالدَلو.

ومفروض إنّو يكون فـي عندو شُعور

ويكـون صـــــــــــادق والمحبِّه منهَلو

ولازم ضمــيرو ينقرا بين السطــــور

كل مــــــــــا عُيون الفاحصين تقابَلو.

وفـــــــوق المنابر ينْسمى مشعال نور

يِضوي عــــا غيرو وكلمتو تِطلَع مَلو

ويزورِق المعنى عــا موجات البحور

والمعرِفه تـــحـــمـــــــل بِديْها مشعَلو.

ويقول: شوفو شو كتَب شاعــــر غَيور

بالموهبِه حلّق عــــــــــــا كون منجهَلو

والحكم عندو يكون عـــــادل والزهور

مـــــــــــا يقول عنها شوك للي بيسألو.

الشاعر جريمِه يكون عـــا شكل القبور

الخارج نعومِه والعضـــــــــــام بداخِلو

مــــــــن واجباتو للوعي يركّب جسور

هوّي خلِق تـــا يكون إحساس وضمير

يعني حـَـــيــــــــاة المنفقَه مَنها إلـــــو.

  

على مسافة واحدة من أنا، أقف متسائلاً عن هذا التناحر في وطن على شفير الهاوية: مَن هو المخلِّص؟ مَن هو صاحب الكلمة على الأرض؟ مَن هو المنادي بالعيش المشترك؟ مَن يقول: كلُّنا للوطن؟ أسئلة برسم الأجوبة:

نحنا شعب مــا بيعْـرف الإيمـــان

وعِنَّا الصــدق أوَّل شهـــر نيسان

مين اللي مَنُّو بالكفـــر معجــون؟

لا مصر متل الخلْق فيها تكُــــون

ولا سُورْيــــــا بتقـــدر ولا لبنان.

بالفعل بَدهــــا شمْـــــــــــط دِينَينا

ضِعنــــا ومـــــــــا فينا حالنا لقَيْنا

مــا منعرف النؤمــِــن ولا الآمين

مـــــــع بعضْنا منضَــــلّ علقانين

والغرْب كلّو.. بيضحَك علينا.

تا نصير متل الناس مـــا منصير

كِترو الــهُـــمــــــــوم بقلِّة التدبير

عا طُول عم نمْشي على الطِمَّيْش

ليش بــَدنــــــا الأبــجــديِّـــه ليش

مـــــــــــا زال عنَّا لغِّة التفجيـر؟

في نـــــاس عـــم بتْضِيع قيمتها

وفي نــــــاس مدعوسِه كَرامتها

قايل ""سَعاده" مــن كوام سنين:

كلّ دولِه بــتــنــحــكَــم بالدِّيـــن

بتكُون عــــــــــم تقْرَب نهايتها.

ـ1ـ
يا بو حبيب اليوم تلفنلي الصبي
بدّو خمس تلاف تا يشمّ الهوا
والدَّين شبر وحقّ عيسى والنبي
مروّب خمس ليرات تا جيب الدّوا
ـ2ـ
ودَين العا خيّك حِمل مَنُّو حَبّتين
وان قلت حَلّ الدفع بتشوفو عبّق
بجزدان مرتو شاف هوني ورقتين
هندز شبابو وراح حطـُّن بالسبق
ـ3ـ
وملحم بو طنسا شغلتو لعب القمار
تا يكون متل الناس وحياتك نِسي
كلما رجع عالبيت بيدُور النقار
وبيدور عا النافوخ ضرب المكنسِه
ـ4ـ
ونعمِه بعدما شوَي طابت رقبتو
سلحب تا حتـَّى يشوف خيّو بو أمين
ولما عطس عالدرب طارت وَجبتو
وكسدر عليها شحن داعس بانزين
ـ5ـ
وعادل لأنـُّو خمس نسوان اشتهى
بدُّو الزواج يكون بعد التجربه
طلـَّق بعد سنتين حـَنـِّه ومنتهى
وطالب مرا عالحارك تجبلو صَبي
ـ6ـ
وطوني ابن مسعود بالطبخه دِري
بتضل مرتو تقول قالت أمّها
بالمعكرونه حط لـِحْماتو غِري
ومن وقتها ما عاد فتحت تمّها
ـ7ـ
ولولو وسليمه ضلّ مودالـُن عتيق
ما بيّنو مَرّه بعين المجتمع
لما إجو يتوَشوشو بنصّ الطريق
وتـْنيْنهم طرشان جنـَّزنا السمع
ـ8ـ
وأنور لأنـُّو تعوَّد يحبّ الجُلوس
وصاير متل جاموس ما عاود حلو
لما ركب "بالباص" تا يوّفـِّر فلوس
قامو تلاته وقدّمو مقاعد إلو
ـ9ـ
والشاعر الحفيان من مدِّة زمان
لهَوني وصل مخنوق هـُوِّي ومطلـَعو
وهلـَّق بعدما قرّش وقرّش كمان
بدَّك وساطه صار تا تحكي معو
ـ10ـ
بسدني النثر عالشعر عامل انقلاب
صار الضمير الحيّ بَدّو مراجـَعه
شربل بعيني قال: ما بطـَلـِّع كتاب
ما زالهم إخدو الحروف مقاطـَعه
ـ11ـ
ويا بو حبيب سألتْني وريتو عَفاك
للستّ "فنصا" الناس منها مأمـَّنه
عا ضهر شاعر عاطفي عملتْ ملاك
وعا ضهرها جلالـَين مودال السنه
ـ12ـ
وعمـَّك بو فوزي بعدما كاسو كرع
جنينِة لطيفه بهمـّتو صارتْ طحين
قلبين "قرّه" بسّ مش أكتر زرع
صارو بـِساعه خمسميّه وأربعين
ـ13ـ
وبطرس إبن شاهين وصّلـِّي خبر
إنـُّو عا ذوقو شغـْل ما عاود لقى
"عالدول" قاعد متل ملحم بو جبر
تا يحكّ راسو وقت ما عندو بقا
ـ14ـ
وزهره بتمـَّا سنّ واحد ما بقي
وهوني نهار التقيت بخالك سليم
ضحكت إلو عا كتفها لمَّا لقي
وهوِّي معو بالقلب جابولو الحكيم
ـ15ـ
ومرتو لـْبو حنـَّا يا ألف شحـَّارها
ما ضلّ عندا ربع نتفة عنفوان
ومش بسّ طالع "دمّله" بمنخارها
عا لسانها التالول عامل مهرجان
ـ16ـ
ويا بو حبيب اليوم قالولي "رَضا"
صهر العَليها كان غاضب باسها
كتبتْ إلو الرزقات عن حبّ ورضـّا
لما "الفـَرد" كان عْلى طاسِة راسها
ـ17ـ
وسمعان غازي بكبر بطنو ما حدا
من دعستو عا الأرض بتخاف الطريق
لـَكـْنـَيْن كبِّه كان سافق عالغدا
ولما إجا لعندي سفق كومة سْليق
ـ18ـ
و"بلقيس" عالسبعين حطـِّت كم سنه
وبتقول: بَعدي بطلعتي نعمة كريم
يوم التلاتِه طافت عليها الدني
وعينك تشوف الكحل دايب "والكريم"
ـ19ـ
و"نزهَه" يا عَيني راحت لعند الطبيب
وقالت إلو: من الحُب قلبي منحرَم
بدها بـِوَجبه تركـِّب سْنان الحليب
وضِرس العقل تا يْصير ياخدها "كرَم"
ـ20ـ
وجاري عن الشيطان صوره مصغـَّره
البسمه عا تمُّو بتنسَمى ورقة نعي
من النوم فيـَّقني بساعه مأخـَّره
تا يشوف كنـُّو خفـِّتْ السعلِه معي
ـ21ـ
وعن لحقة النسوان ما بطـَّل "كريم"
تخمين حسّب كلّ إكلِه مجدرّه
هلـَّق تعلـَّم كيف بيحاكو الحَريم
وتعلـَّم النافوخ كعب الكندره
ـ22ـ
وعينك تشوف اليوم كيف صاير خليل
حامل بايدو هاتف عْلى المستوى
قللي بو حنـَّا: شـُوف زَنـْكـَل عا التقيل
قرْش العا جيبو فات ما شمّ الهَوا
ـ23ـ
وإيمان صاير صيتها مْعبّى البلد
إخدتْ رجل أعمال من عيلة جحي
وضلـِّت شي عشر سنين تا جابت ولد
من زوجها لليوم بعدا بتستحي
ـ24ـ
وتا خبّرك عن مَرْت عمـَّك بو ربيع
بعد "النـِّزل" عم يطلع بدَيْها نسر
وقت اللي قالت: "أوف" بالصوت الشنيع
ما ضلّ صحن قزاز إلاَّ ما انكسر
ـ25ـ
ومرَّه بسهرَه حضرة الشاعر أمين
غنـَّى قصايد خضر وانهزّ الحـِما
ونسوان من "بَشتون" بحلفلـَك يمين
نظـْمو قصايد زرق من لون السما
ـ26ـ
وقللي بو حنـَّا بعدما الزيت احترق
بسيـَّارة ابراهيم طار البانزين
ولمَّا دلـَقلا بتمّها شويِّة عرق
صارت تطـَوْطِح عا الشمال وعا اليمين
ـ27ـ
ومن "أحمديـِّه" ما بقا يشكر أديب
شحْم الدني صارت عليها مجَمّعه
من كتر منها ناصحه يا بو حبيب
مبارح صرفـْها عا الطريق بأربعه
ـ28ـ
وطنـُّوس جَنّ وقال: ما عندي حقوق
عالدرب بَقـْبَش ضاع مِنـُّو المستوى
وبالبيت فرمة لحم مش ممكن يدوق
حَطّ القبض عا حْصان وتـْعشّى هوا
ـ29ـ
وعينـك تشوف اليوم كيف صاير خليل
بالنصح حتى يصير جاموس ابتدا
زعلان هلـَّق قال من حنـَّا جميل
كلـُّو لأنـُّو ما رِضي يْعِيرو ندى
ـ30ـ
ومرقت عا خـَيـَّك قال تا تسْطح زبيب
"نـَسطه" الما في إنسان بزمانو مدَح
ومن كتر منها مشَبْشله يا بو حبيب
نِسيتْ الوجبه عند خيـَّك بالقدَح
ـ31ـ
ونونو لإبن فيـَّاض ما دفعتْ حساب
ولا يوم قالت: خود دَين مْقيـَّدو
ولمَّا عليها تغالظو أربع شباب
بأربع خمس صابيع قالتلن: خـِدو
ـ32ـ
ومرتو لأبو طنُّوس كرهتْ سهرتو
بالرغم إنُّو بالشـِّعر فكرو حصَر
صحنـَين فـُّول كبار آكـِل حضْرتو
وقوّص عليها وداختْ بلمح البصر
ـ33ـ
وعا الانتخاب اليوم نازل "جوليان"
مش للنجاح الحظّ مش ماشي معو
تا يعيـّطولو مرشـَّح السابق فلان
وبجاليتنا يصير يرفع إصبعو
ـ34ـ
و"بكابراماتا" الشعب كلـُّو أنكليز
ولاد العرب أصوات صارو بْلا صدى
و"بماركفيل" كلّ الخليقه "مالطيز"
ومنهم لهلـَّق بعد ما ترشـَّح حدا
ـ35ـ
ومع "بردقانه" ما حدا عندو مكان
الأصوات معها وباقيه بمحلـّها
وجرجي سليم الأحمدي مرشـَّح كمان
وحنـَّا محمـَّد عن "غرانفيل" كلـّها
ـ36ـ
ووجبه عا ذوقـَك قال سامي للطبيب
بدّي لأنـُّو طالبـِه منِّي المرا
ودخلك لا تنسى تركـِّب سْنان الحليب
بالعمر بدها ترجع شـْويِّه لورا
ـ37ـ
"وسالم" حياتو عا العذاب مطبـَّعه
البهلِه عا راسو كَبّ قهوه وكَبّ كاز
وعاود وقع بالأرض يوم الأربعا
وقت اللي حنـِّه صابـْتو بعين القزاز
ـ38ـ
ولما دبح شحتول صاحبنا سميح
وبالدبح مَنـُّو متل ما عم يدِّعي
مرتو قالتلو: اللحم لونو مش مليح
"عالسكت" قـَلاَّ "انفزرت الغـَمِّه معي"
ـ39ـ
وسلمى ما بدها سباق ومعلـَّق عفيف
يا دلّ دلـُّو الربح عَينو فـَرْجتو
حَطّ القبض عا حصان أعرج يا لطيف
وهلـَّق متل الحصان صارت عرجتو
ـ40ـ
ونجلا قويـِّه كتير مَنها من الضعاف
بالسهل شافا مرهِج وقلبو انأسَر
عليها هجم من وصلتو متل الخراف
و"بقّ بقّ" لمَّا قلـّها حنكو انكسر
ـ41ـ
يا بو حبيب بقول وحياة الصليب:
ورده ما همّا مين قلبو بيُوجَعو
صوفر لها عا الدرب من جمعه حبيب
ومن وقتها لليوم ما حِكيتْ معو
ـ42ـ
"ونزهه" بَدال البودرَه حطـّت طحين
عا خدودها وتـْتـَلوعو ولاد الزغار
وبالعمر زغرتْ نصّ ساعه جوسلين
وقت اللي لبست شعر أسود مستعار
ـ43ـ
واليوم لو بتشوف كيف صاير ميشال
صرلو حوالي شهر دَقنو ما حَلق
ومش بسّ رابط سنسله بإدنو الشمال
بتقول سعدى: بزِكرتو معلـَّق حلق
ـ44ـ
وريمون خالك عِيشتو صارت دَمار
عا السكت ماشي والجياب مصوفـَره
قضّى حياتو بالسباق وبالقمار
وعا كلّ دعسه لاحقو لسان المرا
ـ45ـ
وجبُّور أكبر مشكله عا البيت جاب
وصارت همومو بالدني ما بتنحَصى
تخلـَّق عا مرتو وقلـّها: "بنت الكلاب"
ولمّا ضربها كفّ راحتلو بعَصا
ـ46ـ
وبنت وصبي جابت "كومندينا" لرفيق
وبدها أسامي أجنبيِّه مرتـَّبه
ووقت اللي هيِّي وإمّها زادو النقيق
سمّى البنت "هشّ هشّ" و"غـْضاب" الصبي
ـ47ـ
وقلت لبو راجي عند إختو "سيسَبان":
فتـِّح عيونك "عالنصح" شوف الحَصل
حاجي بشوَرما تنفخ البقره جِهان
قـَللي: أنا عا سْوادها بزْرع بصل
ـ48ـ
ويقبر شبابو بْلا عقل صاير سمير
مبارح بعينو حصرمه إبنو فقـَر
وهوِّي متل فدَّان وبْيجْعر كتير
كهرَب سمانا ودرَّج جنون البقر
ـ49ـ
وإلنا و جع بالراس جابت "إيفلين"
حكيتْ لنا قدَّيش هيِّي معذَّبه
البرغش عا "لَهتا" قال: مَحلا المورتين
يمكن بتمَّا سْنان تـُوم مركَّبه
ـ50ـ
ولمَّا عا ورشة بو عبد حَوّل سميح
عا الأرض نخّ وبالجَمع زندو ابتـَدا
قللو نبيل: وحقّ يسوع المسيح
اللي بيشلـَحو الجيعان ما بينفـَع حَدا
ـ51ـ
وعاود رجع "هوّاش" عا نهب الفنون
سجـَّل بإسمو "يا قمر من مشغره"
أوقات عندو بيوت عم تاكل عيون
وأوقات عندو بيوت عم تاكل درا
ـ52ـ
وأربع خوابي من العرق شايل فهيم
ومرتو قالتلو: خْلاص حاجتها بقا
ووقت اللي داقـُن جان قال لبو نعيم:
عرقات متلـُن تحت باطـَك ما التقى
ـ53ـ
ووقت اللي مِرهِج  قال لمخايل سرور
صارت طقوسو بالحياة مغيّره
قللو: كنت زنتلـَّك اليوم الأمور
لو بيضِة القبـَّان مـَنها مْمَودَره
ـ54ـ
وسالم إبن سمعان عامل رعمَسيس
ومتل الأوادم طقم ما عاد اشترى
بالشورت راح عْلى العرس يوم الخميس
طقم اللي عندو قال: عا القعدِه اهترى
ـ55ـ
وعا "الزو" راحت حاتميِّه مَرتْ "جود"
تشمّ الهوا من بعدما فيها عفـَص
المسؤول لمّا شافها حـَدّ القرود
قال لرفاقو: رَجعّوها عا القفص
ـ56ـ
وبدنا بقا عا البيت يلفي بُوهـَنا
سنتين صرلو غايب وحقّ النبي
لبنتو الكبيره قال: رح إرجع أنا
إن كان فيها إمـِّك تخلـِّف صَبي
ـ57ـ
وعا النار حنـَّا الياس عم يغلي حصى
وعم يعزم على الشوربا خالك بديع
وهاني إبن يعقوب فاتح محمَصه
و"بنّ المراد" و"بنّ لادن" عم يبيع
ـ58ـ
وتا خبّرك عالسطح شو قالت هَلا
من بعد عشر ولاد والأربع سنين
دافي إبن بردان طلـَّق انجلا
وعلقان علقـَه بنت كلب بجوزفين
ـ59ـ
ودولي عا إكل الفول بتقلـَّك تعا
وعا الفضل نحنا من زمان معوَّدين
دعستْ عا كم مسمار يوم الأربعا
ويومين إلها منفـّسه إجر اليمين
ـ60ـ
وهوني الشعب قايم قيامة مجدولين
عملتْ فصل ما بينعمَل المْعصَّبـِه
عنها إلو سنتين غايب بو أمين
وكلّ تسع شهور بتجبلو صبي
ـ61ـ
وجابر إبن ممدوح دين الطبَّعو
عالناس خـُوِّه حضرة جنابو فرَض
مش بسّ إنـُّو عم بيـِمضي  بإصبعو
بيزّور تشاكات يبعتلو مرَض
ـ62ـ
وقللي بو سمرا مشكلة آخر زمان
بالبيت عندي وصرتْ متل المِنـْوَشر
سبعين كيلو صارت تجَرِّد حنان
ولسانها كِيلين بحْقوق البشر
ـ63ـ
ويا بو حبيب الناس صارو طايشين
ما في حدا للمعرفه جدّ وسعَى
وطوني عا مرتو كَبّ تنكة بانزين
وولـَّع حبلْ كبريت تا يمزح معا
ـ64ـ
ومرتا يا عيني صارت تقبِّن كتير
ما عاد فيها تفـُوت تحت القنطره
وعينك تشوف اليوم كيف صاير سمير
بياكل عا مزِّة كاس سَطل مجدَّره
ـ65ـ
ولا تفتكر مَمدوح ما بياخـُد قـَرار
ممدوح لو ما ينتهي كان ابتدا
ولو ما بسباق الخيل وبلعـْب القمار
يخرِب ديارو كان ما متلو حدا
ـ66ـ
وموريس تقـَّل دمّ شمسو عا الغياب
لـْحالو بيضلّ يقول وحياتو ذكي
بفول المدمس علـَّق وطار الصواب
وهـُوّي بدون الفول بيكتِّر حكي
ـ67ـ
وملحم همومو بالفعل ما بتنحَصى
تزوّج أمينه والحياة متلـَّجه
كلما حماتو تطلّ بيجيب العصا
وبيقلـّها عالبيت ما بريدك تجي
ـ68ـ
وخيُّو لبُو هيفا من الدني آكل فلق
صعبه لحماتو يقدر يقول: مْبلا
ناقم عليها كتير سبحان الخلق
غير على قِشر الموز ما قلاَّ: هـَلا
ـ69ـ
ومروان قلبو لكاس مليان احترق
كيف النهايـِه رح تصفّـِّي يا ترى
قللو طبيبو: لا بقى تشرب عرق
شاف الحنـَك ملووق والكبد اهترى.
**
انقر هنا لمتابعة القراءة

قـَـلــِّي "بو صندَل" لمْ كنتْ سارح

يـــــَـــوم التلاتِه وخاطْري جـارح

اسْمحلي تا قلّك يــــــــا إبـن مِلكي

ولو كان مـــــا لي طِشم تا إحكـي 

شو صـــــــــــار فيِّي أوَّل مبارح:

مش بَسّ ماشي كنت مـــــن دُوني

وعا الدايـــــــــــــــر مْفتّق بنطلوني

عين الـــــقـــْــــزاز نْسِيتها بالبيت

حــَــــــــدّ الخزانه فوق تنكة زيت

مَطرح مـــــــا كنتْ مطلّع جنوني.

الحَرقه الإجـِتني قلت: بـِخـْفــيــهــا

ومنشان روحــــــــي روح إعطيها

الغبْرا مْسحتْ عن إصبع الجَفصين

وإجــــــري الخشب لبَّسْتها قـَلـْشِين

كـِرمال مـــــــــــــا يْبيّن فِسخ فيها.

ولمَّا برَم راسي أنــــــــا وعطشان

طلعتْ بوجهي عا الدرب دِكَّـــــــان

وقت اللي كــــــــان مْنشّف لساني

ووجبة نهار الحَدّ يــــــــــا زْماني

جرَّبتْ فيها إفـــــتـــــــــــح قـْناني

مــــــا ضلّ فيها غير خمس سنان.

ولمَّا رجعلي كـــــــــــــلّ إحساسي

جـــــــــــرّبتْ ويسكي أدلُق بْكاسي

حِسَّبتْ إنــُّـــو الطقس صــار منيح

ومــنْ فــَرد كلمة "خَيّ" جَنّ الريح

وشـَعر العياري طــــار عن راسي.

مْخَتيَر أنا أكتر مــــــــــــــن شْويّي

وطــــــــُـــــــول الوقت بينمّلو دَيّي

وناسي عِـــــــيـــار السكري قدَّيش

ولْحدّ هلـَّق مــــــا عرفتْ من أيش

العميان عــــــــــم يتقاتلــــو عْليِّي.

ومحـــتــــــــار شو بعْمل بـِجيراني

منهم جياب الكَيف طــــــفـــــــراني

مــــــــــن تحت راسُن من أنـا فلّيت

وكنت عْلى نتفه بْلا عـقل صــــفّيت

لـــــو كــــــان عندي العقل بـِرّانـي.

ويــــــــــــــــا ريت بقـْدر أقعد بْلايي 

ولا إسمـــَـــــــع ولا شُوف "مِقتايه"

مــــــن بعد مــــــا جابو لها التابوت

غَيّرت فكرا مـــــــــــــا بدها تموت 

إلاَّ نــــــــــهــــــــار الأربعا الجايي.

ورِجَّال عندا يقـْبر صْحــــــــــابـــــو

ما بيُوقف الشحَّاد عـــــــــــــــــا بابو

متلو بخيل بها الدني مـــــــــــا شفت

ومــــــــا في حدا ما قال مِنُّو قــْرفت

عندو حُضــــــــــــــور بيشبه غيابـو.

قدَّام بيتي وقفتْ عـــــــــــــــــا مهلي

مـْــــــــن البـاب طلعتْ أختها البَهلــه

ســــــــملله عَليها إسمها "سوسان"

قالت إلـي: أهـــــــــلا بـــِدون سْنـان

وكنت عْلــى نِتفه وقـــعـــتْ بالسَّهله.