صوتَك ندَهني، قمتْ من غفوتي ملهُوفْ،

بقبِش بتوْب العتم عن وجهَك الغالي؛

ومخطُوف لوني، وانت وجهَك قمَر مخطُوفْ،

وعبّيت كفّي صدى من صوتَك العالي!

لبنان...جرح الشِعر انت، ووجَع الحروفْ،

لولاك ما بينعجِن بالشوك موّالي؛

مقمّر رغيف القهر، ومْحَروقَه الحرُوفْ،

والقمح وعد انكتَب عَ جبين الحقالِه...

وكلما سألني حَدا عنّك، بقلّو: ظروفْ!

بفرّق ملبّس رجا وبشدّ عا حالي...

بخبّي دمُوع الحجَر حتّى ما ابني يشوفْ:

بيصعَب عليّي البكي قدّام أطفالي!

لْمحتَك بنَومي حجَل، ريشُو حبق منتوفْ،

والتلج كومة صلا، وبرّا هوا شمالي؛

عُمري غزلتو الك: مبُروك شال الصوفْ،

ورح ضلّ حبّك لآخر خَيط من شالي!

+++++

(في الذكرى الثالثة لغياب الصحافي بطرس العنداري)

I

كلما انذكَر بطرس العنداري

بترقُص فراشه فوق أشعاري،

بتنزل الرقّه من مسَا أيلُولْ

تكسدِر معي عَ درُوب أفكاري..

وبتصوّرُو بْ "دالويتش هيل" مشغُولْ:

يكتُب، يشيل، يحطّ، ويداري؛

وبسمِه عَ تمُّو منوّره عا طُولْ،

بسمة دهب أصلي، مش عْياري..

لو كان بطرس هون، شُو بيقُولْ؟

بيقُولْ: ها الموعد التذكاري

بيردّني من عتمة المجهُولْ

متل الشجر، متل القمر، عاري؛

بيفلُش الطِّيبه من أهل الأصُولْ

عا عمر عشتُو ليلة مْكاري..

وبسرُج من حروف الجريدِه خيُولْ،

وبطبَع غيابي عا ورَق الفصُولْ،

بترجع "نَهَاري" تزيِّن نْهاري!

II

زادِت الغربِه بعد ما فلّيتْ،

راح السقف، فات البرد عَ البيتْ؛

وع الباب واقِف بالشتي نادي:

وينَك يا بطرس، ليش ما طلّيتْ؟

غيبة تلات سنين، بزيادِهْ!

اْرجعلّك شي ليلِه وشُوف شُو خلّيتْ:

حفلة زجل، والكلّ ردّادِهْ،

عجقَه ما فيك تشيل منها بيتْ!

فْقدتلَّك، اشتاقتلَك عيادي،

المرفع سألني: ليش ما دقّيتْ؟

يا ريت ما خلصِت الزوّادِهْ،

يا ريت بالقنديل دمعة زيتْ؛

يا ريت سمعِت صرختي، الوادي

ورجّع صداها متل ما غنّيتْ؛

يا ريت شي موّال بغدادي

يردّ الزمان لْ ضاع عَ السكّيتْ..

عا قدّ ما ال"يا ريت" منعادِهْ،

سمّيتْ حالي بغيبتَك "يا ريتْ"!

III

جدَّك المتريتي وجه إيمانْ،

وانت دْرستْ بشبيّة الرهبانْ،

وطلعتْ علماني، وكتاباتَكْ

كرّستها لحريّة الإنسانْ...

وأسّست لجنة فكر ع حْياتَكْ

ساحة حوارْ بتجمع الأديانْ:

وين صارِت اللجنه بغيباتكْ؟

قولَك اسم بخزانة النسيانْ؟

وما ضلّ الاّ ودّ رفقاتَكْ

لْ بعدُو الوفا بقلُوبهن عمرانْ:

بيردّدُو عا طول كلماتَكْ،

وال"كي لا ننسى" الرمز والعنوانْ...

وبعيُون "لميا" بشُوف لفتاتَكْ،

ولون الفرح والعزم بالصبيانْ،

وبنت الوحيدِه، سحر طلاّتَكْ،

اْسمحلي ، محلّك، قلّها: مبرُوكْ،

ورشّ القصيدِه زهر عَ العرسانْ!

IV

ويا ريت بطرس كان بعدُو هونْ:

تا ينكتبلُو شي سطر عن "عونْ"،

ويقعُد حدا يفلفِش بها الأخبارْ:

شو صار من كونكورد لْ بانكستاونْ؛

وليش طوني من "غرانفيل" طارْ،

وليش صار اللون ما لو لونْ...

يا بُوزياد، الكون رفّ غْبارْ،

وإسمَك لْ بيدهِّب غْبار الكونْ!

،،،،،،،،،،،،،،،،،

سيدني – حزيران 2015

هل المرايا انعكاسٌ بريء للوجوه والأفكار والمشاعر، أم هي تتدخّل في السرّ لتُعيد تركيب المعكوس وتُضيف اليه؟ يلحّ عليك هذا السؤال وأنت تتصفّح كتاب الأ ب يوسف جزراوي، وعنوانه: "أحاديث قلم/ في مرايا الذات والمجتمع (2014)". في مستهلّ كتابه يُعلن المؤلِّف: "...هذه مقالاتٌ سكبتُ فيها من ذاتي والواقع المُعاش"؛ هي اذن تجلّياتٌ لتساؤلات الذات واشكاليات المجتمع التي خبرها الأب جزراوي في ترحاله السندبادي من العراق الى أوروبا، وأخيراً الى استراليا.

يبدو لي أن الكاتب يسير فوق حَبلٍ مشدود، ويحاول الاحفاظ على توازن دقيق بين الوطن والغربة، وبين الذات والمجتمع، وبين الماضي والحاضر، والأهمّ بين رسالته الكهنوتيّة ورسالته الأدبيّة. كأنّ الكاتب الشاب ما زال يتلمّس فرادته، وسط المتناقضات المتعددة، فجاء كتابه الجديد شاهداً على بحثه الدؤوب عن التوازن الصعب...هو يقارن بين موروثات وتقاليد حجريّة من جهة، وسلوكيّات دخيلة من جهة ثانية، مما يجعل الانسان المعاصر واقفاً باستمرار على خطّ الزلازل.

ولا يخفي الأب جزراوي حسرته وغضبه على ما آلت اليه أحوال مسقط رأسه العراق، وحنينه الى ايام بغداد الهانئة. ومن غضب إرميا المقدّس، الى ثورة يسوع على تجّار الهيكل، يشير الكاتب بأصابع الاتهام  الى ما أسماها "مهزلة الربيع العربي" التي تحولت الى "ربيع" دموي قسّم البلاد وهجّر العباد وأطاح بالمبادئ والعقائد والقيَم. ويعلن الكاتب/الكاهن الأشوري بصوتٍ عالٍ: "آن الأوان لنعتنق ديانة الحُب"، فهل من سميعٍ أو مُجيب؟

باختصار، تلك الأحاديث هي مرايا، والمرايا هدايا من الروح القدس الذي يشفِّف روح الكاتب لتستطيع التقاط إشارات الأرض وعلامات السماء...هي مرايا تكشف لك بصدقٍ مكنونات ذاتك الفردية وذاتك الاجتماعية، ولا يقلّل من أهميتها اسلوب وعظي هو بالنهاية رسالة الكاهن المبشِّر...الأب جزراوي يمتشق القلم بيدٍ، وبأُخرى يحمل الصليب، في توازن انساني رائع ومثمر، فتأتي النتيجة إعلاناً للبشارة على مذبح الرب، وبين دفّتي الكتاب...والله في الحالتَين يتمجَّد!

يا صاحبَ المعالي

ذات صيفٍ، منذ أكثر من ثلاثين سنة، وقفتُ في ميدان إهدن مزهوّاً وقلتُ:

ريحة القهوِه عبّت الميدانْ،

وصلُو الجرايد، صيّفُو الحرُوفْ؛

ريحة النخوِه ندهتْ الفرسانْ:

صارُو الحروف سيُوفْ!

من كان يتوقّع آنذاك أنّ ريحة النخوة الإهدنيّة ستعطِّر يوماً غربتي القسريّة!

شكراً يا معالي الوزير على الشرف الكبير الآتي مع درع وزارة الثقافة، مذهّباً بتوقيعك. يكفيني الإحساس بأن الجمهوريّة اللبنانيّة تفتقدني، وبأن وزيراً في حكُومتها يدوّن اسمي في سجل ثقافتها، وليس في الدوائر العقاريّة، أو الأحوال الشخصيّة...ومن إلاّك، يا الإهدني النخي، يفلش شرشف المحبّة على شعراء هاجرُوا أو هُجِّروا، وما زالوا يكتبُون سفَرهم أسفار شوقٍ وحنينٍ على أوراق الخريف...شعراء، ذنبهم أنهم فقراء ولا يدينُون بالولاء الا لحزب الكبرياء، فيستكترُون عليهم التفاتةً من عين الأرض أو دمعةً من عينم السماء.

يا صاحب المعالي

من جارتك "بحويتا" سلامٌ،

ومن شفَقها وكرَزها وسنديانة ساحتها شكرٌ وتحيّة،

ومن هنا، من سيدني البعيدة، أضمُّ الذكريات باقةَ حُبٍّ وأُرسلها اليك، يا حارسَ الذاكرة الثقافيّة، وصديق العصافير المهاجرة...ولعلّني أعتذر لك عن رسائل وإشاعات سُرّبت اليك من هنا، همّها التشكيك بما لا يخفى على معاليك! ويا ليتهُم يحذُون حذو المحامية النشيطة بهيّة أبو حمد، "الرسولة ببالها الطويل حتى الينابيع"، التي حملَت قنديلها وراحت تفتّش في الليل عن شعراء أكلَت الغربة عمرهم وأحلامهم...

يا صاحبَ المعالي،

الهجرة الى استراليا حديثةٌ وغنيّةٌ بالأقلام المبدعة شِعراً ورسماً وصحافةً..وما المكرَّمون السبعة الاّ عيّنةٌ مباركة من بيدر العطاء الواسع..حبّذا لو جعلت وزارة الثقافة من مبادرتها السبّاقة تقليداً سنويّاً تنظّمه وترعاه القنصليّات اللبنانيّة في ديار الإنتشار، فيتّسع التواصل، ويزهر التفاعل، وتشتدّ أواصر المودّة  بين لبنان وابنائه المبدعين في أصقاع الأرض.

يا صاحب المعالي

ذات صيفٍ، منذ أكثر من ثلاثين سنة، وقفتُ في ميدان إهدن مزهوّاً وقلتُ:

الصفصاف شو بيخافْ:

كرجِت دمُوعو بالقنا..

ولمِّن بكي الصفصافْ

صفصاف إهدن ما انحنى!

بُوركتَ، يا صفصافة الطِيبة، يا معالي الوزير!

فؤاد نعمان الخوري

سيدني – 7 كانون الأوّل 2014

الى الصديق الشاعر فؤاد نعمان الخوري

مع المحبة والتقدير.

دمعة فرح.. دمعة حزن..بـــردان؟

حرارة الــبــركــان ب دمّــــــو؟؟

مـنـقـول؟ حاضر؟ دامـع وفرحــان

كلّن سـوى مــع بعضن الـتـمّـــو

ترجف بايدو بــركــة الايــمـــــــان

بوّس قــونــتـها.. لمّــعـا بـكـمـــو

ومدري شو قـلاّ؟ ما حكي بلسان

وقـلاّ قصيده ... ومـا فـتـح تــمّـــو

بتـصوّرو ب هيك حــالـة كــــــان

مـعـهـا حكـي... الها شكي همّو

وفـضّـى مع الدمعه قلب مليــــان 

وحـدو صـلـيـبـا.. اللي فهم غمّـو

نيّال قـلـبـك يــا فـؤاد نـعــمــــــان

بـوقـت اللي ديـك المسبحة ضمّو

مسبحة امّك؟.. ما في رهـبـــان

متلها.. ب مـسـبـحـهة اهـتــمّــو

وين في بعد متلن؟..هاك النسوان

التحضر العدرا ... كـل ما يسمّـــو

بذكر انــا .. لما زرت لــبــنــــــــان

مـتـل الطـفل يـبرم عـلـى امّــــو

لا المسبحة لقيتا .. ولا فستـــان

ولا شـال امّــي .. احضـنــو ضـمّو

**

تعليق الشاعر فؤاد نعمان الخوري على القصيدة

 مشتاق اغمر روميو وضمّو،

وعلّق قمار الورد عا تمّو؛

ها الشاعر ل بيدهّب الأبيات

برقّة شعورو وبوهج دمّو...

تنيناتنا منقدّس الامّات

وهمّي فرض منقول عن همّو؛

ولمّا القصيده ضوّت الشمعات،

هونيك بين الشمس والغيمات،

دابت صلا امّي ب صلا امّو!