مصر قبل الثورة وبعدها/ د. ماهر حبيب

قبلها أنبوب الغاز فى سيناء سليم ومفيش حتى كلب ضال بيقرب له

بعدها أنبوب الغاز إتفجر سبع مرات فى 9 أشهر والبقية تأتى

قبلها الشعب كان بيخاف من الشرطة والقانون

بعدها الشرطة بتنفخ فى الزبادى

قبلها السلفى بيخاف يربى دقنه ويعلن أفكارة المتطرفة

بعدها السلفى دقنه أكبر من دقن أبو الهول والفتاوى بدون حساب

قبلها البنك كان عنده إحتياطات من العملة الصعبة

بعدها فاضل 3 أو 4 أشهر ونبقى على الحديدة

قبلها البلد بتبنى مدن جديدة متحضرة للتوسعة على الخلق

بعدها الدولة بتسعى تهد كل العمارات الجديدة بعد ما تسحب الأرض من تحتها

قبلها الأمن كان مستتب على الأقل فى الشارع

بعدها الحرب الأهلية بدأت فى بلطيم وسوهاج

قبلها التحرش الجنسى كان بيبقى بعد رمضان وفى عيد الضحية

بعدها التحرش الجنسى 365 يوم فى السنة والباقى أجازة

قبلها الزبالة كانت بتبقى موجودة فى بعض الأحياء الفقيرة على فترات متقطعة

بعدها الزبالة موجودة فى كل شوارع مصر وإللى يعرف شارع ما فهوش زبالة يبلغ عنه علشان نورد له الزبالة إللى نقصاه

قبلها الشغب فى مباريات الكورة كان يتعد على صوابع الأيد الواحدة

بعدها المباراة إللى تتلعب من غير شغب يتعاقب النادى باللعب بدون جمهور

قبلها بنزين 80 موجود أغلب الوقت

بعدها إللى يلاقى بنزين 80 يبلغ عنه النيابة والصحف

قبلها الصحفيين بيلحسوا جزم النظام

بعدها هما هما نفس الصحفيين بيلعنوا أبو خاش النظام

قبلها السياحة مصدر هام من مصادر الدخل

بعدها السياحة فسق وفجور وماسونية وعمل من أعمال الشيطان فإجتنبوه

قبلها شرم الشيخ بلد السياحة والجمال

بعدها شرم الشيخ بلد سرقة الأدوية المخدرة من الصيدليات وسرقة الفلوس بالسلاح من شركات السياحة

قبلها السايح ييجى يستمتع

بعدها السياحة خطر ووزارة السياحة تحذرك من أخطار التصييف

قبلها التوكتوك ممنوع فى المدن الكبرى

بعدها التوكتوك وسيلة المواصلات الرسمية فى جميع شوراع مصر

قبلها الموظف المصرى بيشتغل نص ساعة فى اليوم

بعدها الموظف إللى يشتغل نص دقيقة وما يبضربش باقى اليوم مجرم وجبان

قبلها الكنايس بتتبنى وليها منارة وقبة وصليب

بعدها غيروا إسمها وبقت مبنى خدمات ولو حطوا عليها صليب تتهد بإشراف الشيخ علان وسيادة المحافظ

قبلها الست إللى تجمع بين زوجين تتحاكم

بعدها تعاشر عشيقين وتتحرق من أجلها الكنايس

قبلها حمل السلاح جريمة

بعدها تبقى مغفل لو ما شلتش سلاح فى جيبك

قبلها تعالى إستثمر فى مصر

بعدها لو إنت أهبل وعبيط تعالى إستثمر فى مصر

قبلها العبارة بتغرق فى البحر

بعدها العبارة بتتحرق وتغرق

قبلها القطر ما بيستناش حد

بعدها أبقى قابلنى لو الناس مشيت من على شريط القطر

قبلها المتظاهر بينضرب بالخرطوش وقنابل الدخان

بعدها المتظاهر القبطى يتم دهسه بالمضرعات

قبلها مذيع التليفزيون الحكومى بياخد 15 مليون جنية فى السنة

بعدها نفس المذيع بياخد أكتر وبلاش قر ومش حا نقول لكم كام علشان الحمد والسعد ما يبقاش فقر

قبلها الأهلى بياخد الدورى بمساعدة الحكام

بعدها الزمالك بيخسر الدورى بمساعدة الحكام علشان خاطر حمار عيون الأهلى

قبلها الحالة مزفتة بطين

بعدها الحالة مزفتة ومنيلة بستين نيلة