حانلاقيها منين والا منين؟/ د. ماهر حبيب

الإعلام المصرى المتحول الذى كان يمسك طبلة وصاجات أيام حكم الرئيس السابق مبارك أصبح الأن ينقل الخبر كما يحمل الذباب الميكروبات بدعوى أننا فى زمن الحرية فينشروا حتى الغسيل القذر وفى خضم مزبلة الأخبار تخرج علينا الصحف بأخبار تفور الدم أخبار تعكس حالة الوكسة إللى وصل لها الشارع المصرى فهناك التسيب الأمنى وإنتشار البلطجة و هناك أخبار تبدوا كأنها أخبار حوادث لكنها أخبار سياسية يجب أن توضع فى المانشيت الرئيسى للجرايد لأنها برامج الأحزاب الدينية الجديدة وما يجرى هو بروفة جنرال قبل ما يقعدوا ع الكرسى مطرح سرور ويقولوا موافقة موافقة.

خبر قتل بلطجى فى كفر الشيخ وتقطيع جتته حتت لأن الناس قررت تطبيق حد الحرابة عليه رسالة للجميع بأن الإخوان قادمون هما وشركائه السلفيين وخبر قتل حرامى بالقاهرة وتقطيع حتت من مؤخرته ثم تشريح أربع حرامية معاه وقطع يد واحد منهم هو تأكيد لبرنامج إقطع أيد والتانية مجانا بدون عقاب فأنت تطبق شرع الله فلك الأجر والثواب بدلا من العقاب على تقطيع جثث الناس وأنا مش باأتبلى عليهم وخلاص فالراجل إللى قطعوا له أيديه قال للنيابة إن كان فيه ملتحى هو إللى خلاهم يقطعوا أيده.

طبعا حوادث تطبيق الحد مجرد فاتح للشهية لإخوانا البعدا تمهيدا لقطع إيدين ورجلين الناس كلها وبعدها قطع اللسان من لغلوغه منعا للقيل والقال علشان ما حدش يفتح بقه لكن المشكلة الغريبة هو إن الناس بقت تسمع الأخبار وتهز دماغها ببلاهة شديدة وكأن الأمر لا يعنيها وهما مش عارفين إن النهاردة عندى بكرة عندك ومفيش حد متحصن إن واحد بدقن ييجى يقيم الحد عليك ومحدش حا يتحاسب ماهى بقت سايبة.

وفيه خبر تانى بيدل على إن الخطة ماشية تمام هو نشر خبر بأن فيه نادى فى بنى سويف كان البلطجية حا يكسروه علشان تطبيق منع الإختلاط وطبعا صياغة الخبر بتركز على إن فيه ناس معترضه على تطبيق شرع الله بمنع الإختلاط وهما كفرة وبلطجية وفات على كاتب الخبر إن منع الإختلاط ده هو الحادثة مش الإعتراض على القرار ولكن فى البلد إللى بتسمى الهزيمة نكسة والإنقلاب الإخوانجى ثورة فمفيش مشاكل لأنه بيسمو القزم نخله ويسمو رفيعة هانم على واحده وزنها نص طن.

كل ده بيحصل والأحزاب الكارتونية عماله تتخانق على الهيافة و سايين البلد تولع ومش لاقيين فلوس والحكومة الشريفة ناوية تاخد فلوس الناس فى البنوك وتخلع بيها وتبقى حكومة شرف زيها زى شركات الريان وإذا كان الريان ضحك على الناس بدقنه وفتاوى الشعراوى فحكومة شرف حا تلبس جلابية قصيرة بعد الإنتخابات وكل الوزرا يربوا دقنهم علشان الناس تثق فيهم وبعدين ياخدوا الفلوس بعد ما تطلع فتوى من إخوان طظ فى مصر بأنها حلال ع الحكومة الشريفة وبعدين بح خلاص وعليه العوض فى فلوس الناس وعليه العوض فى الشارع إللى بيحكمه الدقون وإللى بينفذوا الأحكام بالسكاكين والسواطير ويا عينى عليك يا مصرى حاتلاقيها منين والا منين