ديموقراطية الجزم القديمة/ د. ماهر حبيب

أصبح السلاح المتاح للتعبير عن الديموقراطية المصرية هى سلاح الجزم لأننا ببساطة شديدة نمارس ديموقراطية غير موجودة غير فى خيالنا المريض الذى يصور لنا أى شيئ نفعله بالمعجزة وأى شيئ نمد له أيدينا يتحول إلى ظاهرة لا تقارن وهو نوع من الشيزوفرينيا حيث يصاب المريض بالتهيؤات وتتنوع تلك التهيؤات إلى أصوات أو أفعال وأشخاص غير موجودين بل يحولهم المريض إلى واقع تماما مثلما ذبح مواطن كندى الجالس بجانبه فى الأتوبيس لأنه تهيئ له أنه عفريت يجب القضاء عليه فإستغل نومه وقطع رقبته.

المواطن المصرى عديم الخبرة بالديموقراطية والذى يحبوا فى كى جى وان صور له إعلامنا المريض أنه حصل على الدكتوراة وأن أعلى درجات التعبير عن الرأى هى قذف المعارضين بالجزم ولأن الإناء ينضح بما فيه فبدلا من تحاجج الفكر بالفكر والرأى بالرأى فقد رأى هؤلاء أن أحسن وأرقى شيئ للتعبير عن الفكر هو فكر الجزم ولا مؤاخذة لأن الذى يقذف شخصا بالجزمة لا يعرف غير ضرب الجزم ولأن ثورتنا هى ثورة الفوضى فتصورنا أن الحرية هى أن أعمل ما بدا لى لأن من أمن العقاب أساء الأدب.

ولأن إذا كان رب البيت بالدف ضارب فشيمة أهل البيت كلهم الرقص وإذا كان تخصص برلمان الندامة وفكره ينحصر بين الصرة والركبة وإذا كان صبيان المحظورة من عصافير أمن الدولة السابقين وأعضاء لجنة السياسات المتخفيين وأعضاء البرلمان الحاليين قد تفرغوا للقضاء على أحمد شفيق ووصلات الردح وإفتعال القضايا وتسخين الناس من بعبع إخوان طظ فى مصر فماذا نتوقع من ناس لا يملكون من الدنيا إلا الجزم لكى ما يقذفوا بيها معارضيهم.

أنا أفهم إللى مش عاجبه حاجة يعبر عن رأيه لكن مش من حق حد إنه يحدف الناس بالجزم لكن هناك علامة إستفهام ليه الجماعة دول مولعين من شفيق وعندهم إستعداد إنهم يولعوا فى البلد بس شفيق ما ياخدش حقه إللى كفله ليه القانون والإجابة السهلة إللى بيضحكوا بيها على خلق الله إنه فلول .... يا سلام ومين فيكوا ماهواش فلول يعنى عصفور أمن الدولة مش فلول يعنى أعضاء لجنة السياسات المخفيين مش فلول يعنى أعضاء المحظورة ببرلمان 2005 إللى جه بالإتفاق مع جمال وشلته مش فلول يعنى ريسهم إللى كان موافق على جمال رئيس بس بشروط مش فلول يعنى أعضاء النقابات المهنية إللى كانوا من المحظورة والنقابات جزء من النظام إللى كان النظام سامح بيه يبقوا مش فلول يعنى كل وزير وغفير كانوا شغالين لمدة 30 سنة ما كنوش فلول يعنى الصحفيين والمذيعين إللى بيهبروا الملايين قبل يناير وبعده مش فلول ولو كنوا نسيتوا إللى جرا هاتوا الجرايد تنقرا ماهو كل حاجة موجودة ع النت واليو تيوب إرجعوا ودوروا حا تلاقوا الثورجية فلول أكثر من شفيق وموسى.

نفسى لما نعمل حاجة نحاول أن نرتقى لمستواها ونرتفع بأنفسنا فوق تلك التفاهات وقلة الأدب لأن مش معقول واحد يروح حفلة أوبرا لابس شبشب زنوبة أو واحد يروح فرح إبنه ولابس جلابية مقطعه وحافى لأنه رمى جزمته على معارضيه ... يا جماعة هناك فرق كبير بين الديموقراطية وجمعية رمى الجزم المصرية كسفتونا وفضحتونا فى وسط العالم إللى دلوقتى ما يعرفش حاجة عن المصريين المحدثين ديموقراطية غير ديموقراطية الصرم القديمة