يا خوفى يا بدران/ د. ماهر حبيب‏

يا خوفى يا بدران

مرسى : لو تأكدت من حدوث تزوير فى الرئاسة سأدعو الناس لثورة جديدة

خالد علي: سأقبل نجاح أي مرشح حتى لو كان «فلول».. و«الثورة الثانية» قادمة

مظهر شاهين: سنقطع يد من يعبث بصناديق الانتخابات الرئاسية

1

أكد طارق الزمر، القيادي في حزب البناء والتنمية، التابع للجماعة الإسلامية، أنه في حال نجاح الفريق أحمد شفيق، المرشح الرئاسي، ستشهد مصر ثورة جديدة، مؤكدا أنه في حاله وصوله لرئاسة مصر، فإنه يجب على المجلس العسكرى أن ينتظر الثورة الثانية.

البلاوى دى عينة صغننة من عناوين الأخبار للبهوات إللى مفروض يكونوا نجوم سياسة لكن لو إتطبق عليهم القانون بجد مكانهم لومان طرة لأن هناك إللى بيقول لك لافيها لأخفيها وعلى جثتى لو فاز فلان بالإنتخابات  كل ده تهديد للناس وتحريض بالعنف و تسخين البلطجية علشان يكملوا مهمتهم إللى بتحصل اليومين دول وبيشيلوها للفلول وبكده الثورة بتاعتهم بقت يا أنا يا الخراب يعنى عاوزين يكسبوا بالذوق والعافية حتى لو عملوا حرب أهلية مش برضوا أنصارهم عملوا حرب أهلية فى العراق وعملوا مدبحة كبيرة تقف مذبحة القلعة جنبها وتقول تعظيم سلام ومش برضوا أنصارهم قلبوا ليبيا عاليها واطيها وأحبابهم فى السودان طبقوا الشريعة وقسموا البلد نصين ففيها أيه لو عملوا مجزرة جديدة فى مصر علشان يخربوها ويقعدوا على تلها.

من ساعة الوكسة بتاعت يناير والبلاوى عماله تتحدف علينا أرباب السجون بقوا رؤساء أحزاب أعضاء جماعات الإرهاب إللى كانت بتوزع القنابل فى شوارع المحروسة كأنها بومبونى فى التسعينات بقى ليهم حزب وأعضاء فى برلمان الندامة قتلة السياح فى الأقصر بيتعمل لهم قانون مخصوص علشان ياخدوا براءة قتلة المحجوب برضه مطلوب الإفراج عنهم قتلة فرج فودة بقوا نجوم المجتمع كل ده ولسه فيهم حيل وليهم عين علشان يلطشوا كرسى الرئيس علشان بعدها يعينوا القتلة وسفاكى الدماء وزراء ومحافظين.

بس إللى ينقط هو الناس إللى ساكته على الهطل ده ويا خوفى يا بدران لايكون إنتخابات الرئيس أخر الإنتخابات لأننا جبنا الإنتخابات ونسيت أجيبلك الدستور وزى ما بدران قال لأدهم الشرقاوى أنا جبتلك الفطور ونسيت أجيب لك العشا قالوا يا خوفى يا بدران لايكون ده أخر عشا وفجأة داس ع الزناد طلع العيار طايش لا أكل فطوره ولا إستنى ميعاد عشا  فالظاهر إن الجماعة دول حا يخلصوا على مصر قبل الدستور ما يطلع ويمكن قبل نتائج إنتخابات الرئاسة.

باقى كام يوم على الإنتخابات الرئاسية بمصر ولكن الفار بدأ يلعب فى عبى بعد النتائج الأولية لأصوات المصريين بالخارج لأن فيه ناس كتيرة من حزب الكنبة كانت فاكره إن التيار إياه مش حا يحصد حاجة لكن واضح إنهم حايكوشوا على البيعة وخصوصا لو بصينا على الأخوة المصريين بالخليج بيتنخبوا مين وطبعا لو المرشح الإستبن أو أخوه فى الجماعة كسبوا الإنتخابات إحنا لا حا نعمل ثورة ولا حتى حا نقدر نفتح بقنا ساعتها نسيب لأعضاء التكفير والهجرة يحكموا البلد وإحنا نرتب حزب التفكير فى الهجرة بجد مش هزار وأنا أضمن لكم إنضمام خمسين ستين مليون مصرى فى الحال ونسيبها لهم مخضبة بالدماء إللى ما يعرفوش غيرها وعوضى وعوضنا كلنا على الله فى مصر المخروسة المحروسة سابقا