برلمان الباى باى/ د. ماهر حبيب

نهاية صبركم خير ولأن الأعمال بالنيات ولأن نيتنا منيلة بستين نيلة فقد رزقنا ربنا على أد نيتنا بمجلس نقاوة ولا فى الأحلام مجلس قندهار مجلس تورا بورا مجلس سواقين التوك توك والمناخير الكبيرة وناقصنا بس نجيب أيمن الظواهرى علشان الصورة تكمل ويا ريت نطلب من الحاج أبو عمامة جثة بن لادن إللى شايلها عنده فى البيت بركة وبكده تبقى الثورة نجحت لأن الثورة هى إللى بتعمل تغيير ملموس ولما مصر تتحول من دولة مدنية لدولة دينية تبقى كده ثورة ولما الرجالة تربى دقونها وتلبس جلابيات قصيرة وبنطلون رجل أقصر من رجل بعد البنطلون والبدل الشيك تبقى ثورة ولما الستات يتحولوا إلى شولة سودا ويطلعوا لنا فى الضلمة أو يخوفوا بيهم العيال تبقى هى دى الثورة إللى على أصولها.

من ساعة النكسة الأخيرة طلع علينا البرلمان القندهارى أول حاجة بقسم نقاوة على كيف كيف النواب وكل واحد يحلف على كيفه إللى يقول لك والعيش والملح وإللى يقول لك وغلاوة أمى إللى عمرها ما خدت جواز أمريكانى وإللى يقول لك وحياة أبويا لأخلى بالى على الدستور والقانون وبعد الهبل ده ما خلص وإتخانقوا على مين حا يورث سرور إبتدى الشغل الكبير بالأذان وسط الجلسة وبعدين دخلنا على العك البرلمانى إللى كله مخالفة للدستور وإستخراج قوانين متفصله عند عم عبده الترزى إللى على أول الشارع وهبل فى الجبل وبعد شد وجذب ضحك عليهم عمر سليمان ودخل وعمل نفسه ما بيعرفش يعد من واحد لألف علشان ياخد فى أيده اليمين الشاطر وفى أيده الشمال أبو إسماعيل وخدوا البمبة الكبيرة ورجع لهم البعبع التانى إللى حا يخليهم يمشوا يكلموا نفسهم فى الشارع.

وبعد مخاص العك الدستورى دخلنا على الحاجات المهمة إللى حا تخلى مصر تطلع القمر وتوصل المريخ وتتفوق على كل دول العالم وحا تجرى أمريكا وأروبا ورا مصر علشان تلحق بمجد وحضارتنا الجديدة بتاعت قندهار ومصرستان الجديدة وبصراحة أنا أقر وأعترف بأن تلك القوانين مش موجودة فى أى برلمان محترم أو حتى مش محترم منذ بدء برلمانات العالم وحتى تاريخه وبصراحة نقر ليهم بحق الإختراع و هذه القوانين هى تصغير سن الجواز للأنثى لأقصى درجة وطبعا مش بعيد إن البنت تتجوز وهى فى اللفة وبعدين خدوا بقى الخبر الجميل والخطير وهى موضوع مضاجعة الوداع  وهو يتيح للزوج معاشرة المرحومة مراته فى خلال ست ساعات من الوفاة وطبعا لازم يشغل ساعة ستوب واتش علشان ما يعديش الزمن المطلوب وياخد حباية فياجرا ونص لأن الحباية بتشتغل 4 ساعات بس ولو خد حبايتين يبقى ذنبه على جنبه وطبعا نظرا لإنشغاله بهذا الموضوع الحيوى جدا حا يضطر قرايبه فى تحمل نفقات الجنازة لأن الزوج حا يكون مشغول يعنى الراجل يضيع حقه الشرعى علشان الجنازة والدفن والكلام الفارغ ده.

وطبعا التقل ورا فعندنا قانون مراقبة الفن والإعلام وجماعة الأمر بالمعروف وتعليق المشانق لأى حد يفكر ويخش على النت علشان يتفرج عن المواقع المحجوبة بأمر ولاد أبو إسماعيل غير تقطيع الأيدين والرجلين والرقاب وبكده كل مشاكل مصر إتحلت والتعليم بقى ميه ميه وإنصلح حاله والإقتصاد إتعدل والصحة بقت بمب والفشل الكلوى إنتهى من مصر وتلوث النيل ما بقاش موجود والسياحة بعثت من جديد وقامت قيامتها والأمن رجع  وعادل إمام دخل السجن ومش حا يطلع منه تانى ده حتى الكورة بقت مية مية والأندية سددت الفلوس إللى عليها والفلوس بقت مرطرطة مش عارفين يصرفوها فى أيه والدورى بقى عندنا منه أتنين واحد يلعب فيه الأهلى مع الفرق إللى بيغلبها وواحد يلعب فيه المصرى البورسعيدى لوحده والجنية بكرة حا يبقى بعشرين دولار أمريكانى والحاج أبو عمامة حا يطلب اللجوء السياسي لمصر والدنيا بقت ربيع على طول مش هو ده الربيع إللى بيقولوا لنا عليه وتم إلغاء فصول الشتا والخريف والصيف بأمر عمدة قندهار وأبشروا يا أهل المحروسة بأن ثورتكم جابت عاليها واطيها والبركة فى برلمان الندامة برلمان قندهار برلمان الوداع  برلمان الباى باى