ديمقراطية كريم شانتيه/ هاني محمد صيام

نظر "كريم شانتيه" المجتمع و بعض مثقفيه و نخبته، إسمع يا سيدي:

* لازم تقول لا للتعديلات الدستورية، كده إنت ديموقراطي و عندك وعي سياسي و مثقف، أما لو قلت نعم، يبقى إنت معندكش وعي سياسي و غير مثقف و جاهل و بيضحكوا عليك باسم الدين ... أو متحالف مع قوى الشر الإخوانية السلفية الجهادية الإسلامية الإرهابية المتواطئة مع القوات المسلحة تحت غطاء الهيئة القضائية الفاسدة (و الدليل "أبريل الآخر" و "15 يناير") و كمان خاين لدماء الشهداء، بغض النظر عن وجهة نظرك الشخصية، لازم تسمع كلامنا عشان إحنا بس اللي فاهمين و انت مش فاهم حاجة.

* مش من حق عمر سليمان - من شهر و لا حاجة - يطلع يقول "المصريين غير جاهزين للديموقراطية" ... لا إحنا جاهزين أوي و الشعب على درجة عالية غير مسبوقة من الوعي و مبارك لازم يمشي .. بس خللي بالك أول مبارك ما يمشي لازم نقول إن الشعب معندوش وعي و إحنا محتاجين وقت عشان نجهّز نفسنا للديموقراطية، و إوعى حد يضحك عليك و يقولك "مش ده تناقض؟" لأن دي ليبرالية و سياسة بس انت مش فاهم ... مش قولتلك إن إحنا بس اللي فاهمين.

* لما مبارك يقول "أنا لو مشيت الإخوان هينقضوا على الحكم" لازم كلنا نعترض عليه و نقوله "بطل إستخدام فزاعة الإخوان"، الإخوان مش بعبع، لكن لما نيجي للجد خللي بالك "الإخوان بعبع" و إحنا بس اللي من حقنا نستخدم فزاعة الإخوان عشان إحنا بس اللي فاهمين ما أنت جاهل و بسيط ... و لا انت مش معايا برضه.

* لما النظام السابق يطلع إشاعات "الأجندة" على الثورة لازم نهاجمه و لما يمشي من حقنا نقول الإخوان عندهم أجندات سرية غير معلنة و بيضحكوا علينا.

* لما كنا بنشوف وثائق أمن الدولة المسربة كنا بنقول يا جماعة خللي بالكو دي منها كتير مفبرك، بس دلوقتي أي منشور أو يافطة (مش وثيقة) تطلع تقول الإسلام بيقولك تقول نعم، لازم تقول علطول "بص الإخوان بيعملوا إيه" بيكفروا اللي بيقول لا، و حتى لو طلعوا و نفوا إنهم يكونوا ورا المنشورات دي قول عليهم "دول كدابين".

* دوّر على أي شيخ غِلِط و قال إن يجب على كل مسلم أن يقول نعم و أن من قال لا فهو كافر و إعمل بوست للموضوع ده بس متقولش الشيخ الفلاني قال كده، قول تحالف قوى الشر الإخوانية السلفية الجهادية الإسلامية الشيطانية بيقولوا كذا و كذا. و إياك ثم إياك تجيب سيرة المشايخ المعتدلين و المفكرين الإسلاميين المستقلين اللي بيعرضوا و جهة نظرهم بموضوعية ... اكفي عالخبر ماجور... و طبعا لازم تقول إن الشعب منساق زي البهايم ورا دعايات المشايخ اللي بيقولوا لا تعني الكفر لإن 77% من الشعب جاهل أساساً و معندوش وعي سياسي و اوعى حد يقولك أمال إزاي الشعب كله نزل و عمل ثورة ... ده مش فاهم حاجة ... أصل اللي نزلوا دول مش أغلبية الشعب !!!! أمال هي ثورة شعبية إزاي؟؟؟؟؟

و لو سألك "أيام الثورة المعارضين لها قالوا إن التحرير لا يمثل الشعب دول 2 مليون و إحنا 80 مليون، كان ردنا إن المظاهرات مش في التحرير بس .. دي في كل حتة في مصر في كل المحافظات ... أمال دلوقتي بنقول ليه المظاهرات كانت محدودة على بعض المحافظات دون غيرها" قوله "الموضوع معقد"

* إذا كنت من العمال و الفلاحين فأنت ليس لك مكان في الديموقراطية ... كبيرك تشتغل عندنا، و إذا كنت من الصعيد و الأرياف فأنت سفيه لا تفهم شيئاً و لازم تسمع اللي بنقولك عليه.

* الديموقراطية هي حرية الإختيار من الإختيارات اللي إحنا بس نطرحها قدامك عشان لو حاولت تختار حاجة تانية تبقى انت متطرف أو بتستخدم الدين في السياسة أو مضحوك عليك.

* طبعاً مفيش مانع من بعض النكت المستهزئة بالدين و أحكامه معتمداً على التخويف و التهويل و المبالغة و استهدف بيها الإخوان و اخلط الأمور ببعضها و دخل اللي بدقن مع اللي من غير دقن و كلهم إخوان شريرين و لو حد قالك عيب تستخدم الدين في النكت و تتريق على الإسلام بالشكل ده إعمل الآتي:

قلبة الوش مع زغرة مع تكشيرة مع رفع أحد الحاجبين و بصوت جهوري و كله حزم قوله "إنت بتستخدم الإرهاب الفكري و تكفرني عشان تفرض علي رأيك؟؟!!" و تاني يوم على الفيسبوك و كل وسائل الإعلام "الإخوان يكفرون النكت" و اشتغل بقى يا معلم.

و لو حد منهم طلع و نفى الكلام ده نقول عليه ده كداب و نقول الإخوان وزعوا منشورات و قالوا كده على الموقع بتاعهم بس شالوها تاني.

كده تبقى انت شاب ديموقرطي من الطراز الرفيع.

للأسف أنا زعلان إن أنا ضيعت وقت في كتابة الكلام ده لإن ده وقت وحدة الصف و إعلاء مصلحة الوطن العليا على الأطماع الشخصية و ليس وقت تبادل الإتهامات بهذا الشكل السافر متناسيين حق دم الشهيد علينا.

ميدان التحرير كان بيقول إيد واحدة

ميدان التحرير كان بوتقة صهرت فيها جميع طوائف و تيارات و قوى الشعب

الشهيد ضحى بحياته عشان خاطر إن إحنا ننعم بالحرية و الديموقراطية و أن نكون شعب واحد متحدين و ليس متناحرين

كنا نشتكي و نحذر من الثورة المضادة و الآن نحن من ننفذها بأيدينا ببراعة فاقت أصحابها الأصليين

نريد أن تعود إلينا من جديد روح ميدان التحرير

أما آن لنا أن ننظر لمصر و نبحث جميعاً كيف نتعاون و نتضافر لنبنيها بغير إقصاء لأي أحد و عدم فرض الرأي الشخصي سواء بإستخدام الدين أو بإستخدام التخويف من الدين

حق الشهيد ... نرجع نحط الإيد في الإيد