الإستهبال/ د. ماهر حبيب

بإلغاء الإعلان الدستورى والإصرار على إجراء الإستفتاء على دستور أم أيمن هو إعلان رسمى من جماعة بديع بإن الشعب المصرى مجموعة من الهبل والعبط والمتخلفين عقليا وإنهم قرروا يستغفلونا حتى النهاية وهم يعتقدون بأنه تم الحجر فى المحكمة على مصر بحكم تنصيب الريس مرسى علينا وهما خدوا حكم بأننا غير مؤهلين للتصرف فى أحوالنا وتم تنصيب إخوان العريان ولى علينا يصرف فلوسنا وبتحكم فينا لأنهم يعتقدون أن الشعب المصرى أصابه الخرف الفكرى ومحتاج يتحط فى بيت مسنين لأن خلاص ما عدش فيه حد ناصح فى البلد غير مرسى وعشيرته.

فى خطوة كلها إستعباط وإستهبال للشعب المصرى قرر إنه يلغى إللى كان حا يتلغى بعد أسبوعين لما كان حا يزور الإستفتاء تحت رعاية كارتر الذى لا يرى ولا يسمع ولا يتكلم وعبارة عن شرابة خرج ومبعوث الحاج أوباما للتأكيد على سيطرة إخوان بديع على الحكم والتخلص من كل القوى المدنية بإشراف الحيزبونة كلينتون يعنى هو إتنازل عن سلطاته الفرعونية مؤقتا لحين تولى سلطاته المؤبدة بدستور الإخوان وأنا مش عارف أقول له غير إنت جايب النصاحة دى من فين يا أنصح إخوانك؟؟؟

هو معتمد إن فيه أرجوزات من من يدعون الوطنية والمدنية حا يستعبطهم ويلبسهم العمة ويشربهم مية أصفرة وبعدين يخرجوا علينا بتصريحات وهم تحت تأثير الشاى بالياسمين ويشقوا الإجماع الوطنى على رفض الهطل ده وبعدين النخبة يقعوا فى بعض وينسوا موضوع الوقت إللى عمال يجرى وفجأة يلاقوا 15 ديسمبر والإستفتاء خلص وحضر الإستفتاء ميت ألف 99% قالوا نعم ويخرج الريس مرسى يشكر أما نعيمة إللى قالت نعمين ويكتشف المغيبين إن العمة مازالت على دماغهم ويروحوا معيطين تانى زى ما عيطوا بعد إنتخابات الرئاسة ويقولوا للمرة التانية إحنا غلطانين ويروح الغلطانين يتخانقوا مع إللى مش غلطانين والشعب المصرى يضرب دماغه فى الحيط لأنه متكول على حيطة مايلة والحيطة وقعت على دماغه وكل همه إنه يطلع من تحت الأنقاض يمشى حاله بلا عيش بلا حرية ولا عدالة إجتماعية بلا نيلة وحيدوروا على إللى يأكلهم عيش وحا يترموا فى حضن الإخوان وتكون حكمة كل المصريين يعيش الإخوان لأنه عملا بالحكمة الحلمانتيشى الكبير إللى يتجوز أمه يقوله ياعمو.

يا حاج مرسى الناس ثارت علشان عارفين إن المصيبة فى الدستور مش فى الإعلان الدستورى بدليل إنك سخرت أعضاء لجنة أم أيمن إنها تسهر على الدستور وكلهم عمالين يترجوا الغريانى ويقولوا له هى حبكت وهو يخبط أيديه فى بعض ويقول على طريقة سناء جميل الليلة ياعمدة ولكن بحكم إن مرسى فاكرنا بنى أدمين براس عجل يعنى على رأى الهنود فى الخليج (مخ ما فى) يعنى مخ مفيش فهو قرر إستكمال الإستهبال الدستورى والكورة دلوقتى فى أيد الثوار يا تكملوا وتوقفوا عملية النصب على مصر وسرقة مستقبل المصريين يا تكتبوا بإيديكم نهايتكم وإن كان فيه كام واحد إتسحل فى المظاهرات الأخيرة تحت سمع وبصر النائب الإخوانى الجديد فبعد ما تعدى الهوجة حا تتسحلوا كلكم بإسم الشريعة والإفساد فى الأرض وإذا كان محمد نوح بيقول إن كان فى أرضك مات شهيد فى ألف غيره حا يتولد لكن لو وفرتوا الشهيد فى ألف غيره حا ينقتل فأرجوكم كملوا المشوار وإسحلوا دستور أم أيمن وحاربوه لغاية ما تلاقوا دستور مصر العظيمة وقولوا لمرسى إحنا مش هبل ولا عبط وبطلوا الإستهبال