أخبار ترفع الضغط/ د. ماهر حبيب

شرف : إتفاقية كامب ديفيد غير مقدسة .........طب ما تلغيها بشطارتك وتعلن الحرب على إسرائيل خلينا نتسلى بحرب جديدة ثلاتين أربعين سنة ده الإيد البطالة نجسة

البورصة تشهد أكبر خسائرها بعد الثورة فى أسبوع رخص الحديد ........طب وماله هو كان مال أبونا ما تولع المصانع ويتسرح العاملين فيها إشمعنا هما يبقى عندهم مكان يشتغلوا فيه أمال مين حايستورد الحديد ويكسب عمولاته يعنى نكون بنستورد الحديد وبعدين نقطع عيش المصانع الخارجية ده برضه إسمه كلام لازم نسرح كل مصانع الحديد خلينا نبتدى على بياض

البرلمان الأوربى يرشح أسماء محفوظ لجائزة نالها مانديلا...........جاتكوا خيبة ده إنتوا عاوزين تخشوا برنامج نحو الأمية ماهى أسماء ووائل جابوا مصر ميت سنة ورا بس مين فيكم بيفهم

الإخوان المسلمين يهيمنون على إنتخابات نقابة المعلمين ........ أهى بروفة لإنتخابات البرطمان أهم فازوا ب90% وفى البرطمان حا يتكرموا على عيال الثورة ب88 مقعد علشان يخزوا العين مبروك عليكم ديموقراطية الدقون

موسي ينفي إنذار المجلس العسكري بسحب الثقة .. المرشحون ينذرون المجلس العسكرى..... ما ترسوا على حل حاتنذروه والا مش حاتنذروه علشان ورانا شغل

وزير الداخلية يكافىء ضابط شرطة لتصديه لمجموعة من البلطجية ...... يا سلام بنكافئ الناس على جزء من واجبها مش برضه واجب الشرطة مكافحة البلطجية والا الشرطة بقت عاملة زى الكتبة إللى قاعدين قدام المحاكم لكتابة العرائض للى ما بيعرفوش يقروا ويكتبوا عجبى عليك يازمن

تحرير‏41‏ عاملا بسيناء اختطفهم زميلهم ....... ماهو كل واحد ليه شوق فى حاجة بعملها ما هى دى الديموقراطية ياريت محافظ سينا يديله مكافأة إشمعنا حرامى المواسير

هيكل في حوار بصراحة مع الأهرام‏:‏ الــــــــوطـن في محـــــــنة .......ماهو إنت وأمثالك إللى خليتونا فى محنة وبالمناسبة فين دليلك على إن مبارك عنده 11 مليار والا الموضة دلوقتى بتاعت قالولوه

سد النهضة الإثيوبي لن يؤثر علي مصر ...... ماهو كان حا يأثر على مصر أيام مبارك وقعدتوا تغنوا تهديد الموارد المائية لمصر مصر فقدت هيبتها فى أفريقيا والظاهر إنكوا فاكرينا عندنا فقدان ذاكرة

العوا: دولة مدنية بمرجعية إسلامية واللى مش عاجبه ما ينتخبش.......هى دى الديموقراطية وإلا فلا واحد يقول لك إللى مش عاجبه يمشى لأمريكا وكندا والتانى يقول لك ما تنتخبش بالذمة الناس دى قادرة تصدق نفسها ولسه فيه ناس ساذجة ممكن تصدق الهطل ده إرحمونا بقى من لعب العيال ده

نهى الزينى : الثورة لم تسقط النظام بأكمله ......أيوه عندك حق دى وقعت مصر كلها مش حته من النظام

أردوغان يلتقى 4 مرشحين للرئاسة ويؤكد محاولة عرقلة الثورة المصرية ستفشل....أهلا بخليفة المسلمين وطبعا حضرتك جاى تختار والى مصر الجديد بعد إنشاء الخلافة العثمانية الجديدة والى لمصر وواحد لليبيا وووالى صغننون لتونس عقبال ما تحضر والى سوريا وبكرة تقول خرسيس ولد سيس لازم تسمع كلام خظرتنا

كفاية علينا كده دى أخبار يوم واحد ما بال لو جيبنا أخبار السبع شهور اللى فاتت حايجرى لنا أيه .....حرام كفاية